消暑健脾去濕—節瓜眉豆冬菇豬展湯
炎炎夏日，最好用些瓜果類煲湯，有助消暑生津、解暑濕，但瓜果屬寒涼之品，有些人脾胃虛寒，面色較差，眼袋浮腫，受不住寒涼食物，不妨用較為有益正氣的節瓜煲湯。
節瓜是冬瓜的嫩種，不太寒涼，味甘淡，有健脾化濕及利尿的功效。配合能補肝、益腸胃又清香味美的冬菇，加上理中益氣、補腎健胃的眉豆煲豬展湯，對夏日食慾不振，神疲乏力、口乾口渴、四肢浮腫人士甚為有益，能消暑熱、健脾胃、袪濕氣。
用料是：節瓜1~2個，眉豆1兩，冬菇4~5朵，生薑3片，豬展半斤。
做法：節瓜刮皮，洗淨切塊；眉豆浸洗，冬菇浸軟後去脚；豬展切塊後出水；全部材料用8碗水煮個半鐘成4碗即可連湯料同食。
~ 小貼士：節瓜現時當造，售價便宜。最好買翠綠色外皮有層絨毛，身形渾圓，長短適中者為佳。
芳姐你好，我先生3月6目因為肝，同腎衰弱已經走咗，在呢段時間裏多謝你的意見同寫很多湯水給我，衷心.多謝你，
娟:
多多保重身體為要!
芳姐你好，我又唔記得問你，啲烏雞煲完可否食用，同時你介紹呢款節瓜煲眉豆，冬菇湯，如果有痛風可飲用此湯嗎?唔該芳姐
娟:
湯料當然可以食用.有痛風豆類只適合用赤小豆,因為赤小豆含嘌呤少又能抑制尿酸.
芳姐你好，我唔記得問你，如果烏雞無新鮮可否買冰鮮，煲嘅時洗唔加片羌，唔該你芳姐
你好，芳姐！兩位小朋友眼白都比較藍，可以煲咩湯水改善到？謝謝🙏🏼
鴨鴨:
小朋友眼白藍可能氣血不足,尤其是缺乏鐵質,現在櫻桃,無花果,紅提子當造,可以給小朋友日常食用.黑色桑椹子,黑提子乾可以當零食.食療可用蓮藕1條,黑豆1兩,紅棗6粒,墨魚乾1隻煲排骨湯,煲夠2小時,全家可飲,一星期2劑,有助補血.
謝謝你芳姐
芳姐：
你好！經期前眼皮重間中頭暈，好疲倦！可用食療舒緩？謝謝！
婷婷:
你可煲些四神排骨湯服,有助改善.四神湯主要材料是淮山,蓮子,芡實,茯苓各5錢,加5粒紅棗煲排骨或豬展湯都可以,全家可飲,最好吃些湯料.
芳姐你好，我想問我先生未出院，暫時飲唔到四神湯煲烏雞，因為佢一陣間食呢隻藥，一陣食嗰隻藥，隔唔到時間飲藥材湯，所以我想煲番茄署仔煲百鰂，清燉烏雞或者煲烏雞，可否加啲百合，咁呢兩款湯辰咗西藥就跟住飲會唔相沖，芳姐仲有無啲湯水可以食咗西藥就唔洗相隔時間就可以跟住飲用，我真係好擔心佢有血癌呢種病，係唔係血氣唔好，飲烏雞湯會好啲，暫時如果清煲加百合有無問題，多謝你成日不厭其煩你為我解答，多謝你芳
娟:
可以加百合,百合含一些物質有助抑制癌細胞,又有清心安神作用.清燉烏雞湯亦佳,番茄薯仔鯽魚湯可以的,加些赤小豆同煮更佳.
芳姐你好，我想問如果百合煲烏雞，同白鯽魚煲番茄，赤小豆湯，如果食完西藥無相隔時間就飲，會唔會同啲西藥相冲嗎?如果買唔到新鮮烏雞可否用冰鮮烏雞，唔該芳姐你的答覆
娟:
不相沖的,一般服西藥後1小時飲較佳.冰鮮烏雞盡量揀細隻的,因為少激素飼養.烏雞本身不太大隻才對.