By 芳姐 ( 7 3 月, 2020 at 12:39 下午)
· Filed under 保護視力/耳、鼻、喉疾病, 外感/頭痛/呼吸道病, 癌症
翻看食療書，見到「桃三李四橄欖七」一句，原來桃樹要栽培三年才結果；李樹需四年；橄欖樹却需要七年才結果。不過原來最長結果期的不是橄欖樹，而是白果樹，白果樹要最少三數十年才能掛果，因而被稱為「公孫樹」，即公公那代種植，到孫兒時期才能收成果實，真有趣﹗
新橄欖樹原來結果甚少，每棵僅生產幾公斤，25年後才顯著增加，多者可達500多公斤。橄欖樹每結一次果，次年一般要減產，休息期為一至兩年。故橄欖產量有大小年之分。今年應該是大年吧，因為街巿賣的青橄欖很便宜，大粒又青翠。
鮮橄欖能清熱解毒、化痰、消積，同時可解煤氣中毒、酒精中毒和魚蟹之毒。今天推介用鮮欖配金羅漢果和雪梨同煮，對肺熱咳嗽、咽乾喉痛、乾咳、氣管敏感等都有幫助。
用料是：青欖15粒，金羅漢果1個，雪梨2個。
做法：青橄欖洗淨，用刀背略拍鬆；金羅漢果沖洗後捏碎；雪梨連皮洗淨，去核切塊；全部材料用6~7碗水煮半小時成4碗左右即成。
~ 小貼士：此茶對癌症化療後口腔乾涸疼痛很具療效，同時亦有抗癌功效。本品清甜美味，對人體健康有益，能治療上呼吸道疾病，可作為抗疫期間的保健飲品。體質偏寒者宜加1個切碎的陳皮同煮。
Permalink
芳姐 你好
女女4歲，發燒6日 ，有咳，有鼻水，有黃色痰。女女唔識咳痰出來，夜晚咳得仲犀利。已睇西醫，食緊抗生素及西藥。 請問芳姐有咩可以煲比女女，幫助舒緩。謝謝你🙏
Kay:
你可用蘇子,萊菔子各3錢入茶包袋煲瘦肉粥供囡囡食,連服3劑,有助袪炎止咳.
謝謝回答。
芳姐， 請問食緊抗生素同西藥，可以煲湯比佢飲嗎？ 例如虎乳靈芝湯止咳湯或者鱷魚肉湯？ 謝謝
Kay:
吃消炎藥表示病邪未趕走,不宜吃補益湯水,但可以飲些清潤湯水如茅根竹蔗馬蹄紅蘿蔔水,或金羅漢果陳皮水等.
芳姐，點解青欖金羅漢果雪梨水煲完係灰黑色？是否煲太久
Yee:
如果你用普通羅漢果,湯較啡黑色,金羅漢果較淺色,配青欖雪梨都不會灰黑色的.
芳姐：
找到你呢篇湯水話化療都適合，但冇青欖賣，有其他可以代替嗎?先謝芳姐！
好好敬上
好好:
可以用桔餅1個代替.
芳姐：
你好！ 請問用手按面頰側,大約面腮位置有少許痛是否扁桃腺發炎？
可煲什麼湯水/茶？謝謝！
sf:
扁桃腺發炎會喉嚨痛,紅腫,嚴重吞口水都痛.按面頰有少許痛可能是按壓太用力,應該不關扁桃腺事.
芳姐：
多謝你的回覆，謝謝！
寒咳可以煲邊種湯？一吹到冷氣或講野就想咳痰白而稀，冇喉嚨痛
訪客:
你可以用陳皮2個,甘草1錢,生薑3片,3碗水煮5~6分鐘服,有助散寒化痰止咳.
我聽日試下煲，今晚試咗你既烏梅甘草菊花茶，見係敏感咳都可以。唔該你～
芳姐 我刚怀孕40天左右 感冒喉咙发炎流黄鼻涕可以食药吗
訪客:
你有喉痛要小心,最好驗一驗深喉唾液穩陣些.可以用這款青欖金羅漢果雪梨(或雪梨乾)湯,對孕婦没影響.或滾些芫荽葉茶瓜(或皮蛋)魚片水飲都有助解表,利咽喉.
飲佐中藥喉嚨舒服好多 但是今日會熱咳 好辛苦
訪客:
你可用枇杷葉5錢,淡竹葉3錢,冰糖適量,4碗水煮半小時成2碗服,連服2~3劑,對熱咳咽喉不適有幫助.
刚怀孕可以饮吗 我想问洋葱蒸水有用吗
訪客:
懷孕可以飲.洋葱性温,不適合喉痛者.
想問金羅漢果揑碎，連殼一起煮嗎？
Sandy:
金羅漢果果肉連款都可以用的.
芳姐，請問慢性咽喉炎有沒有食療可改善?謝謝
訪客:
你可用桔餅1個切碎,陳皮2個,蘋果1個去核,4碗水煮成2碗服,連服3劑,如感到舒服,可一星期3次.
芳姐你好啊，
我住係溫哥華，我地呢道無新鮮的欖出售，但係就有好多唔同國家的醃漬欖買，我可否那個點醃漬的欖按照你的食療一樣咁用呢？？？
謝謝你。
Rainbow:
因為用醃漬欖可能會頗鹹,可以用無花果4粒代替更佳.無花果有抗癌作用,同時亦潤肺利咽,潤腸.
芳姐妳好，
謝謝你的回覆，我想問埋咁可否用醃漬的欖來煲有益口膿痛的湯水啊？或者醃漬欖有咩藥用作用啊？
🙏🙏🙏
Rainbow:
可以用醃漬欖煲湯,有清熱解毒,活血,止咳等功效的.
芳姐，謝謝你🙏！！！
芳姐，
我湊小朋友，成未夠訓，不知是累，定大掃除後吸菌，頸前左烟喉中間位置腫了一粒，吞口水好痛，訓多些好些，一上火頭及背睡都痛，這湯可飲？我平日身體虛些易感冒，湯會太谅嗎？或飲其他舒緩？
Man man:
你可以飲此湯,咽喉有腫塊如飲了3劑未好要看醫生,可用潄口水每天潄口3次,有助消炎.如頭及肩背痛可煲粉葛赤小豆扁豆瘦肉湯飲,煲夠2小時就不寒涼.
芳姐，
阿膠粉可怎樣飲。Thx
May:
阿膠粉只要煲補益湯水,即可趁熱加入2茶匙阿膠粉調勻服用.熱的紅棗炒米茶這類熱飲都可以加些阿膠粉調勻服用.
芳姐，你好，
我的老闆有血癌，現正食緊標靶藥，由於藥的副作用，睡覺不好，有D失眠，所以，醫生比左D安眠藥食，不過仍然要抽血跟進，唔知有什麼湯水食療可以飲用？
謝謝妳。
有心人😊
有心人:
血癌可以多用藕粉煲小米紅棗粥食.藕粉在佐敦裕華的超巿有售,可以買百合藕粉,有助安神.黑豆粉,黑木耳粉亦可適量沖服,在裕華我亦見有售.
謝謝你，我剛剛同佢分享了。
芳姐你好，朋友送左包好大包的〈雞骨草葉〉比我，話可以焗茶飲，但我唔知應該加哋咩去焗同埋有咩功效，可以教教我嗎？謝謝!
Mo:
雞骨草葉我都未見過,雞骨草清肝熱,一般都要煲最少2小時.葉片焗茶未知效果是否一樣?
早晨芳姐，我昨日見一間中藥房有售，老闆話可以用雞骨草葉+杞子焗水飲可以清肝火的而，不知是否啱配。
Mo:
雞骨草葉配杞子可以護肝,清肝火.
芳姐，你好，有良性子宮肌瘤可有什麼食療。謝謝。
Winnie:
可用黑木耳2朵切碎,紅棗4~5粒,去核,紅糖適量,4碗水煮成1碗服,一星期2劑,可令肌瘤不增大.但用激素飼養的快大定禽,塘魚,燕窩,雪蛤膏等盡量少食.
知道，謝謝芳姐。
請問五味子，決明子或山楂等泡水可以飲用嗎？謝謝。
Winnie:
五味子,決明子,山楂泡茶服有助降壓,消脂瘦身.你可以飲.
Thanks. 芳姐。
早晨，芳姐，我家有黑糖，可以取代紅糖配搭這食療嗎？或是用紅糖較合宜？謝謝你。
Winnie:
可用黑糖代替紅糖.
謝謝你。 👍😊
芳姐，
請問邊樹買到你所講嘅青欖又青又大粒？我呢邊賣嘅好多都係細粒、兩頭尖同黑點。真係買唔落手🙈
同埋用刀背拍鬆，青欖汁彈到4圍都係有乜方法？用毛布包主先？甘未整到成條毛布都係汁😨。如果買多些少點處理可保青綠？
芳姐你好☺️,
上網睇到,咳又分寒咳熱咳燥咳,網上話很多可分辦方法…嘻….但真是好難分辨……樣樣都好似有啲似😆..哈..完全分不到
網上又講到不同咳要唔同飲,又無啲係寒咳熱咳燥咳都飲得嘅喎😥..我又分唔到….飲錯又話有影響……
我係時不時咳兩聲,每次咳都係一兩聲起幾聲止唔會咳好耐個D,咳落有啖聲嘅但又咳不出痰,無鼻水鼻涕,
係成日覺得喉嚨總係有啲啖痴住咁,總之呢成日整日就o係度”奇奇拑拑”😖 ,
但不嬲什少飲凍野,生冷野亦無咩食, 係不過都無咩飲熱野暖水嗰啲,因為平日飲嘅大多數室溫.
想請問平日可以煲啲咩茶或湯水適合可以介紹?
謝謝❤
Doris:
咳嗽晚上咳多,痰白清稀多屬寒咳,但如果伴有喉痛,就算是寒咳都屬熱症,要用涼湯涼水,喉痛消失才治寒咳.你的情況試用法夏,茯苓,白朮各3錢,陳皮2錢,甘草1錢,5碗水煮成2碗服,連服3劑,對喉中有痰又咳不出有幫助.
芳姐請問金羅漢果是否台灣做及糖份是否很高,其實好好味但怕時常飲會否血糖高
美莉:
金羅漢果的甜味是砂糖300倍,屬天然果糖,不易升血糖的,可以常服.
芳姐，
請問邊樹買到你所講嘅青欖又青又大粒？我呢邊賣嘅好多都係細粒、兩頭尖同黑點。真係買唔落手🙈
同埋用刀背拍鬆，青欖汁彈到4圍都係有乜方法？用毛布包主先？甘未整到成條毛布都係汁😨。如果買多些少點處理可保青綠？
芳姐：請問金羅漢果，深啡色羅漢果，兩種有何分別？這個茶，已經煲了幾次，非常有效，謝謝你上次介紹給我
訪客:
金羅漢果和普通羅漢果療效相若,不過我覺得金羅漢果由於低温烘焙而成,没有煙薰味,煲湯好味些.
芳姐，
從前好討厭飲羅漢果，但自從見到你介紹金羅漢果又怕又係咁嘅味道，所以決定一試，果然與別不同，唔知係咪先前嘅品質問題還是其他，又黑又怪味。我近排買了幾個試下煲出嚟好甜好清又無怪味。👍