By 芳姐 ( 19 6 月, 2016 at 3:50 下午)
· Filed under 小兒常見病
小兒的抵抗力較弱，容易受病菌感染，最令父母擔心的，莫過於小兒發高燒，怕他們會抽筋，燒壞腦。其實小兒發燒多數是上呼吸道感染，或患腸胃炎等，通常2~4天內會慢慢退燒，但由於現時的細菌、病毒十分厲害，幼兒發燒一定要找醫生檢查，看有否細菌感染或出現嚴重的併發症。
熱病後(即退燒後)的小兒通常氣管弱、脾胃亦差，易流虛汗，所以可以先清一清臟腑熱，再另行煲些健脾益氣的湯水作調理。今天介紹這款「石斛蘆根麥冬湯」有滋陰清熱、調理臟腑的作用。
鮮石斛具有調理陰陽的雙向功能，它的補養脾胃功能既可補後天脾胃，亦能補先天腎陽，熱病後陰陽兩損，最適合用鮮石斛作調理。而蘆根清熱生津、利尿、除煩；麥冬養陰生津，潤肺清心。合而為湯，對小兒病後餘熱未清，目赤腫痛，咽乾喉痛，虛火煩躁，便秘等均有幫助。
用料是：鮮石斛6錢，蘆根5錢，麥冬3錢。
做法：鮮石斛洗淨，切段；蘆根、麥冬浸洗；將全部材料用5碗水煮1小時成2碗即可供服。
~ 小貼士：鮮石斛是名貴藥材，近年由於各地大量培植，售價已相對便宜。這些鮮石斛早前在上環一間中藥海味店購買，但未必經常有售。亦可以用乾石斛3錢代替。成人大病後亦可用此湯作調理，用量可各樣加多些少。
~ 小啓：近日教課工作較忙，網友問題未必能全部作回應，敬請原諒!
Permalink
你好，小朋友4歲鼻水咳已經持續好耐，有睇中西醫情況時好時壞，早兩日又高燒跟住有嘔吐過，不斷話肚仔痛不斷痾瀉，瀉咗好多次水狀，現在大便開始慢慢成形軟，請問可以煲咩湯水補充身體？謝謝
淳媽:
小米最健脾,可以用紅蘿蔔半個至1個切薄片,紅棗6粒去核,切片,陳皮半個煲小米粥供食,連服3劑.四神排骨湯可以煲來全家服用,能健脾袪濕.
謝謝芳姐!
芳姐, 你好, 我個女今年三十歲, 這幾天 發燒, 喉嚨痛, 鼻塞, 眼紅腫, 看了醫生, 醫生說是細菌感染, 開了抗生素給她吃, 我現在可以煲些什麼幫她復原和病後調理呢？謝謝！
恩:
你可用泡些夏桑菊茶供服,連服3劑,服抗生素都可以隔1小時飲.病好後可用青欖15粒,青蘿蔔1個,南北杏1兩,無花果4粒煲瘦肉湯,煲1小時,全家可飲,有助清熱利咽.
謝謝芳姐回覆!🙏
Hello芳姐, 我個女差不多好返了, 燒已退, 喉嚨冇痛, 隻眼仲有少少紅, 但有些咳和有很多腳汗, 這個青欖湯水還適合她嗎？因我在外國居住, 有困難找青欖, 有其它東西可代替嗎?
恩:
没有青欖可用無花果4,5粒切開代替.北茋能止虛汗,如有北茋可加1湯匙切片同用.
謝謝芳姐回覆！
芳姐, 你好, 我個女已差不多好番晒, 但還有些咳, 有什麼湯水我可以煲給她喝呢?謝謝!
恩:
你可用桔餅1個,雪梨乾7~8片,陳皮1個,5碗水煮成2碗供服,連服2劑,看能否改善?
女女人4歲，之前中咗甲型流感後，氣管敏感鼻涕倒流多咗，之前試過每晚半夜咳到醒咗，之後睇咗中醫調理咗三星期夜晚可以瞓到覺，但而家每朝起身都有鼻涕倒流，攪到咳有痰，日間間中都有咳嗽，請問可以煲啲咩湯水可以紓緩吓症狀？謝謝你
Quin:
你可用辛夷花8朵,生薑4片,葱白3棵,3碗水煮10分鐘供服,可加少許砂糖,好味些.連服3劑,有助收鼻水.
芳姐，你好，我女12歲最近中第二次新冠後半個月後現在又發燒，已經燒了4日，有食退燒藥，退了今日都係燒返，喉嚨乾有痰，且成日話頭痛，請問我可以煲咩比佢飲，唔該芳姐
Angela:
燒不退表示病邪未趕走,可以用蘆根5錢,生薏米1兩,生石膏5錢,淡竹葉3錢,5碗水煮成2碗供服,連服3劑,有助退燒,如燒不退要看中醫.中醫對這種情況療效較佳.
芳姐，孫女3歲半，上星期患氣管炎，氣管有喘，食藥後差唔多好。因現在仍有食藥，可能是藥物影響，常常大喊大叫，容易扭計。請問有什麼湯水幫助解煩躁？謝謝！
fanny:
你可以用蘆根5錢,生薏米1兩,百合5錢,雪梨1個去核,5碗水煮成2碗供孫女一天分服,連服2劑,有助清熱除煩.
小兒3歲半，發燒左3日先退燒，仲有流鼻水，咳有痰. 食左西藥之後心情會好煩燥..有咩易入口嘅湯水推介？佢唔飲苦味嘅野..唔該哂
Ann:
你可以用文章中這款鮮石斛蘆根麥冬湯水供服,没有太大藥味,可以加幾粒紅棗同煮,或飲前可蜜糖調服亦可,有助清心除煩,潤肺止咳.連服2劑.
點解我上網睇，發燒有啲人話唔可以食石斛嘅？究竟係咪小朋友發燒一定食得？
Kelly:
鮮石斛是小朋友退燒後(文章中寫明是熱病後)才用.在發燒期間不宜用補益中藥材是怕病邪會坐大,因為人體吸收營養會有節制,病邪是有幾多吸幾多的,如果過量用補益品,怕病邪坐大了就不容易趕走它! (我已經加了退燒後幾個字.謝謝提點!)
因為我見下邊有人問你發緊燒可否飲此湯？你話可以飲，有助退燒嘅。咁即係可吾可以？😅
Kelly:
抱歉!應該是燒退後才飲較理想.雖然蘆根有助退燒,配生薏米退燒才合適,但配蘆根,麥冬最好燒退後才飲好.我已將留言刪走,並向留言者致歉!
😥我煲左俾我仔飲，還燒上了40度，所以先問⋯⋯
咁有咩湯係啱發燒嘅時候一定飲得到？因為發燒一定有細菌或者病毒，食西药退咗燒都係會重新燒返上去，咁飲啲咩先可以發燒嘅時候幚助清到體內嘅病毒同細菌？
Kelly:
薏米能殺少量病毒,蘆根能退熱生津,竹葉芯也是能退燒的,用生薏米1兩,蘆根5錢,竹葉芯3錢煲水代茶服能退燒.
芳姐，現在疫情期間，現在BB三個半月，發燒36-39度，貼了退熱貼就會退到38°，再喝點水再變成38度，現在變37度了，帶去醫院醫院說沒有1歲以下的退燒藥了，請問有什麼湯療適合三個半月BB退燒的！
皓晧媽咪:
你可以用蘆根3錢,生薏米5錢,5碗水煮成1碗作開奶茶供一天分服.如餵人奶,可用針筒型餵水器,分多次餵入BB口中.蘆根和薏米都是非常平和的藥,對BB没副作用,有助清熱退燒.生薏米更有助殺少量病毒.
兒子抵抗免疫力差，容易發燒生病，請問芳姐，平時無病既時ok, 日常可煲咩比佢飲，可幫助調理身體增强免疫力？謝謝
訪客:
你可以去裕華或農本方買[玉屏風散]顆粒沖劑,此方是北茋,防風,白朮三種中藥組合而成,主要是提升免疫力,減少傷風,感冒發燒的.可隔日沖服.
芳姐，謝謝你的回覆，兒子33個月大，都可以飲呢個沖劑嗎？
Sylvia:
你仔仔近3歳,可以服用,兒童量減半.用2茶匙温水沖服就成.
芳姐，你好，我個女2歲9個月，大傷風左三日有伴低燒37.3-37.5，食左西藥兩日鼻水收曬，今朝都退左燒，但仲有少少鼻塞，少少咳，有痰，係咁出汗，請問可以煲D咩湯水俾佢飲？謝謝🙏
訪客:
你可用浮小麥5錢,陳皮1個切碎,金羅漢果1/4個,4碗水煮成碗半供1天分服,有助止汗袪痰止咳.