By 芳姐 ( 11 4 月, 2012 at 6:51 上午)
· Filed under 小兒常見病
小兒肺氣弱,患上感冒後會咳嗽一段時間,甚至喘咳不休,故平時可以煲些有益肺氣,具化痰止咳功效的補益湯水作調理,以增加抗病能力.
[海底椰川貝杏仁鱷魚肉湯]湯味清甜可口,有滋補肺腎,化痰止咳功效.對小兒肺氣弱容易咳嗽,哮喘很有幫助.
用料是: 海底椰3錢,川貝母3錢,南北杏1兩,急凍鱷魚肉6兩(乾品2兩)陳皮1塊,蜜棗2枚.
做法: 鱷魚肉洗淨,出水;其餘材料浸洗;將全部材料放入煲內,用8碗水煮約3小時成4碗即成.
~ 小貼士: 此湯温補,全家可飲.圖中的是正宗非洲海底椰,邊緣有鋸齒狀,果肉雪白有果肉紋.
Permalink
芳姐你好。我囡今年快4嵗，由2嵗幵始，每次轉季就病，咳三個月，每次感冒就咳好久。食西藥舌頭就會一条条白色紋，請可憐下她幫下我。她真係喝藥似喝水咁。依家早晚用橙色聞氣，但一病都係照咳好久
如果仔仔呢個星期每到夜晚咳得犀利是否可以煲海底椰川貝杏仁鱷魚肉湯都可以謝謝芳姐🙏🏻
芳姐你好👋🏻
如果仔仔宜家三歲呢個星期每到夜晚咳得犀利是否可以煲海底椰川貝杏仁鱷魚肉湯？謝謝芳姐🙏🏻
Jimsu:
夜晚咳多數是寒咳,可以煲鱷魚肉湯,但現時真正非洲海底椰非常貴,可以用虎乳靈芝3錢代替.
芳姐你好。我囡今年快4嵗，由2嵗幵始，每次轉季就病，咳三個月，每次感冒就咳好久。食西藥舌頭就會一条条白色紋，請可憐下她幫下我。她真係喝藥似喝水咁
芳姐：
我今日買了一兩海底椰120蚊，會吾會係假貨呢？我之前買的都160-170蚊一兩的。
ceci:
海底椰你要看有果肉暗紋,肉雪白有狗牙邊應該屬正貨.如果邊緣滑溜,果肉表面光滑及没有果肉紋,又不夠雪白,應是假品.
Mo:
鱷魚肉鮮品、乾品都同樣好,在大間超巿買急凍鱷魚肉不會買到假貨,乾品有可能有假貨冒充.急凍2人量半磅就夠;乾品用兩半至2兩.
芳姐! 妳好!請問燉鱷魚肉湯(二人份量) 應該用急凍鱷魚肉 還是鱷魚肉乾比較好?份量分別多少?THANKS!
芳姐 ,
完全明白, 妳解釋得非常清楚及詳細. 多謝感激.
芳姐,
明白. 那名為[丹]的棕櫚果果肉有什麼功效呢 ? 街市有時會見到一些急凍的棕櫚果果肉是白色的, 功能是否一樣嗎 ? 兩种都可用來煲湯嗎 ? 如可以, 應該買那一种比較好一点.
麻煩再指教一吓….謝謝謝
火星人:
這些鮮海底椰其實是棕櫚果,亦即所謂[丹]的東西,有中醫認為[丹]並没有化痰止咳功效,無論鮮品,乾品都一樣,只有止瀉、止血作用,由於没有明確驗証,故我覺得不如用木瓜,鮮百合更佳.
土耳其地理上也屬中東區,所以土耳其的無花果味清甜;埃及、巴基斯坦的無花果亦同樣蜜味;美國出產的顏色較淺,煲湯亦不錯.其實全部都可以作煲湯料.
火星人:
那些並非真正海底椰,是一種名為[丹]的棕櫚果果肉.真正海底椰有狗牙狀果肉紋,很薄身,果肉雪白,有條深啡色邊才是正品.
芳姐,
前兩天買了些海底椰, 並不是如圖中白色, 是米黃偏淺啡色, 請問有海底椰是這种色嗎 ? 如有, 是否可以用來煲湯呢 ?
芳姐：你好！
我囝囝已經飲了鱷魚湯，
但是D痰一路都清唔晒，
請問有D乜湯或煲D乜野可以清痰？
謝謝！
Mic mic:
如果仔仔痰未清,可以用川貝末2錢燉蘋果一個,2碗水燉半小時服.蘋果去皮,切粒燉.加些少純蜜糖好味些.
芳姐：
仔仔呢兩日朝早開始有咳，臨天光同醒左都會咳幾聲，聽到佢有痰聲。日間都會有幾聲咳。咁樣算寒咳嗎？應該煲什麼俾佢食呢？
ceci:
你可用紅蘿蔔1個,切薄片,紅棗8粒去核,北杏3錢,5碗水煮成2碗供服,對小兒久咳有幫助.
芳姐你好，我個仔上星期有流鼻水，咳嗽，發燒，但已睇咗醫生，藥未食完，但宜家鼻塞，咳有痰，咳嗽時痰聲好重，可以煲咩湯水？仔仔有蠶豆証！
芳姐你好，我個仔上星期有流鼻水，咳嗽，發燒已睇咗醫生，藥未食完，開始好D，但宜家鼻塞，咳有痰聲，手腳凍，早上有時咳到嘔痰，係白色的，可以飲乜湯水？佢有G6PD!
momoko:
你可以用紫蘇葉,北杏各3錢,辛夷花3錢,生薑3片,片糖少許,3碗水煮15分鐘供服,有助化痰止咳,收鼻水.
芳姐,
謝謝你的解答, 承接11月5日的問題, 那天再去看e生, e生說仍有需要多食幾天抗生素, 聽肺時有d喘聲, 開左舒張氣管藥ventolin聞蒸汽, 但未知是否對該藥過敏, 手肘及膝起了紅點, 因此e生說先停該藥 (現在只吃抗生素及咳藥水). 有煲紅蘿蔔紅棗北杏茶, 咳今天有好一點, 尋晚成晚冇咳, 係早上起身先咳, 但明顯聽到有喘聲! 在現時沒有西藥處理喘咳的情況下, 有冇咩湯水可以煲協助下, 以上那個鱷魚肉湯歲半ok 嗎, 現在煲適合嗎? 謝謝! 不好意思問題多了.
Leong:
用白果6粒,去芯,核桃肉1兩,南北杏1兩,紅棗6粒煲粥,有助止咳定喘.
芳姐，
唔好意思！
上面提問是我，kennex
芳姐，
早晨呀！
尋日婆婆見囡囡發燒同大便好臭就煲左淡竹心，紅蘿蔔，馬蹄，粟米心佢飲，飲左2碗到，但尋晚1點多開始咳唔停，有痰， 一瞓低無耐就係咁咳啦！ 另外尋晚7點已退燒，但今朝6點多又燒返。今朝係咁咳到嘔左痰，係透明白色既。 請問我係咪依家應煲辛夷花，紫蘇葉，2片薑佢飲？唔該晒。
訪客:
如果囡囡燒不肯退,要看醫生才成.現時可用紫蘇葉,生薑茶供服.辛夷花如鼻塞才用.
kennex:
燒未退都可以飲這款麥冬菊花茶.鼻涕倒流就加5~6朵辛夷花同煮.
芳姐,
你好.
乾咳可用麥冬,菊花,桔梗,甘草各1錢,羅漢果1/4個,3碗水煮15分鐘供服, 請問係咪要退左燒先可飲呀??唔該!
另, 如鼻涕倒流開始間中有痰聲係咪都係飲哩隻呀??唔好意思!咁多問題.
芳姐,
你好.
剛睇左醫生話又係鼻水倒流感染喉嚨發炎引致發燒. 依家可煲d咩俾佢飲呀?
已經日日用淮山粉煲粥/飯, 但都咁易病! 我真係好灰好擔心, 都唔知應點幫佢好.
芳姐你好,
bb1歲半,10月中傷風後一直咳冇斷尾, 直至上星期五開始又感冒發高燒, 由於今次e生話已咳一斷時間且耳仔入面有紅(曾患中耳炎), 所以今次有需要食抗生素, 已吃第4日,沒有燒, 但仍然非常咳, 早晚不停咳, 今天會再看e生, 請問現時可以煲乜幫佢舒緩一下, 聽得出佢咳得好深, 多痰, 咳唔到出黎, 且手腳冰冷但出好多汗, 求賜教
Leong:
你試用紅蘿蔔1個,切薄片,北杏3錢,紅棗6粒,去核,4碗水煮成2碗供服,連服3劑,對小兒久咳有效.另外可幫bb拍背,拍到有咳表示該處積痰,要多拍幾下,然後飲水,有助將痰排走.
芳姐,
你好!
10月中時請教過你煲哩款湯水同辛夷花俾囡囡已好返. 但好景不嘗, 不知是否星期五大風吹一吹又問始咳啦! 今次係乾咳, 日頭同半夜都有幾聲, 已煲左1次虎乳靈芝川貝湯同燉左鱷魚肉湯都仲有咳, 今朝仲有d發燒! 唉! 芳姐可唔可以教我應點做, 依家可煲咩佢飲? 我囡20個月大好易發燒同咳, 好返後可平時煲咩黎增強抵抗力呀?? 萬分感謝幫忙!!
Kennex:
乾咳可用麥冬,菊花,桔梗,甘草各1錢,羅漢果1/4個,3碗水煮15分鐘供服,能清肺止咳.如高燒必須看醫生.如好番可用北茋,防風,白朮各3錢,生薑2片,紅棗4粒,5碗水煮成2碗服,一星期2次,有助增强免疫力.
芳姐，好感謝你耐心詳細的解答。我剛剛轉做全職媽媽，學煮飯，好多野都吾識，所以有很多問題。以後亦會多來你網站學習。謝謝你。
CECI:
歡迎常來瀏覽!
謝謝芳姐。以我囡囡體質偏寒來說，平時煲保健湯時，有咩藥材或食材要避免呢？可以介紹一些保健粥或湯水嗎？朝早我多數都煲粥俾兩個小朋友做早餐的，好多時都係用肉碎，粟米，紅蘿蔔。南瓜或蕃薯煲粥營養價值高嗎？
ceci:
你可以用紅棗6粒煲小米粥(可加一些白米,黏稠些)供囡囡作早餐,加肉碎,粟米粒,紅蘿蔔粒都得.南瓜,番薯粥甚有營養價值,間中可煲給小朋友食,一來多些變化,二來營養更全面.煲保健湯水,常用的淮山,杞子,蓮子,芡實,杏仁,白果,核桃,雪耳,百合,紅棗,南棗,沙參,玉竹,麥冬等全都可用.這類既是藥物,又是食物的食療品對小兒肯定有益.其他人參,巴戟,鹿茸,當歸,肉蓗蓉等太補益的中藥材小兒就不適合了.
芳姐，請問用雞心棗得嗎？要去核嗎？
CECI:
可以用雞心棗,去核較好.
謝謝芳姐，我會試試。另外，哥哥3歲，又係咳未斷尾，加上有鼻涕，醫生剛開左抗生素，可以一齊飲這湯水嗎（鱷魚肉湯.配白果5粒,去芯,核桃肉1兩,南北杏1兩,紅棗6粒煲瘦肉湯）？
ceci:
哥哥如果鼻涕清稀,可以用鱷魚肉湯,主要治寒咳.
芳姐，你好！我囡囡咳了成個月，食左好多西藥，最近食左抗生素總算咳好多好多，但仲有幾聲咳，聽到有痰聲。請問食呢個鱷魚肉湯可以嗎？海底椰會吾會好涼？我囡體質好似吾受得太涼，食親就好易咳。
ceci:
囡囡體質偏寒,宜飲鱷魚肉湯.配白果5粒,去芯,核桃肉1兩,南北杏1兩,紅棗6粒煲瘦肉湯服,可一星期服2次.用紅蘿蔔1個,紅棗6粒,4碗水煮成2碗供服,對小兒久咳有良效.
我又想請問三子粥，准山茨實粥呢兩款粥係咪發燒唔食得架？？
痲煩哂！！
tung:
三子粥發燒可以食.淮山芡實粥就不適宜,没發燒才食.
你好! 芳姐
北茋,防風,白朮,辛夷花各4錢,生薑2片,紅棗6粒,6碗水煮成3碗
北茋,杞子,紅棗,雪耳各適量煲瘦肉湯
以上的湯水, 味道會否味甜, 因為囡囡甜的湯先肯飲, 是否有紅棗已經足夠有甜味?
祝福
christyliu
christyliu:
北茋杞子紅棗瘦肉湯幾好味的,如要甜加兩糖蜜棗同煮就成.其實不應讓小朋友偏甜的東西,用來防治疾病的,没苦藥味已經很好.
芳姐:
謝謝你的回覆!
你好! 芳姐。
– 女兒將近3歲半, 一個月前傷風咳, 鼻水大約2星期好了, 但咳嗽一直未好, 差不多咳了成個月, 咳時有痰聲, 晚上間中都有咳, 有什麼方法可止咳?
– 我先生2星期前都傷風咳, 他頭一兩日有少少鼻水, 之後就只有咳, 咳有痰, 但他不懂吐出痰, 現在日間及晚上都有咳, 有什麼方法可止咳?
– 我先生有鼻敏感, 天氣轉或空氣不好, 就流鼻水, 平時有什麼食療/湯水可改善, 小朋友可否一同飲用? 他晚上睡眠時, 間中發出鼻(寒)聲, 有時女兒都醒了聽到, 鼻(寒)是否無法改善?
– 女兒今年9月返幼稚園, 接觸多了細菌, 有什麼食療/湯水可增強抵抗力?
不好意思, 問了這麼多問題, 期待你的回覆, 謝謝!
祝福
christyliu
christyliu:
你可以用沙參,麥冬各5錢,南北杏1兩,紅蘿蔔1個,無花果4粒,陳皮1塊煲瘦肉湯供全家服.有助潤燥止咳.囡囡可能脾及肺氣虛,所以久咳不癒,平時不妨多用淮山,芡實,蓮子,白果,杏仁煲粥供服,因為健脾補肺可以袪痰,痰少就可減少咳嗽.
另外可用北茋,防風,白朮,辛夷花各4錢,生薑2片,紅棗6粒,6碗水煮成3碗,你先生和囡囡可以一齊服用,囡囡1碗就夠.此湯能提高免疫功能,防鼻敏感.一星期2次.用北茋,杞子,紅棗,雪耳各適量煲瘦肉湯,亦有助提高免疫力.
你好芳姐！囡囡已經無咳痰少，好咗好多！多謝你！！但到我自己有事啦！我近呢兩年氣管有問題一咳就幾個月至好，食西葯都無用！我有試過飲龍脷葉湯但無效，我上星期又開始咳返，條氣管好束……我唔想再食西葯啦！就問有咩湯水可以幫到我！麻烦哂！
tung:
你試用烏梅2粒,菊花,麥冬,各2錢,甘草1錢,3碗水煮15分鐘飲,連服3~5天,有助止咳.你可能是敏感咳.
謝謝您！我試下！！
請問咩係三子粥？
tung:
蘇子,白芥子,萊菔子各2~3錢,入茶包袋,用來煲粥,對痰咳有良效.2歲左右用2錢,3歲以上用3錢.
你好呀芳姐！我已經煲咗紅蘿蔔，紅棗，北杏比個囡飲，但佢都仲係好多痰，有鼻水，已經食咗兩個星期西葯仲嚴重咗，佢係一早一晚特別多痰鼻水，中午就無咁多，請問龍脷葉，羅漢果，紅蘿蔔，南北杏湯我個囡10個月飲得嗎？麻烦哂！
tung:
你要煲三子粥才對痰咳有幫助.或用茯苓3錢,白朮3錢,陳皮1錢,北杏2錢,辛夷花5朵,紅棗4粒,5碗水煮成2碗供服,對痰多流鼻水有幫助.龍脷葉湯10個月bb可以飲,一天分服1碗就夠.
你好,
我囡19個月大, 上星期三開始有輕微發燒, 食左2次西藥退燒後就開始有鼻涕同咳, 日頭好小咳, 但一到夜晚就咳得好密同有痰聲, 睇西醫話係鼻水倒流感染喉嚨引起, 所以係夜晚會咳得多, 食左藥後已好返好多晚上沒有再咳, 但初初瞓覺時會聽到有鼻鼾聲, 熟睡後就沒有.尋晚聽到還有一, 兩聲咳同有痰聲, 於是瞓前食猴棗末, 但食左返而成晚咳! 請問我應煲咩好哩? 此湯水可以嗎? 謝謝幫忙!
Kennex:
你可用紫蘇葉,辛夷花各2錢,生薑2片,片糖少許,2碗半水煮10分鐘供服,有助宣肺散寒止咳.這款海底椰川貝湯可以煲來飲,囡囡一天服1碗就夠.
謝謝！！
你好呀！想請教下，我個囡10個月大，4日前發完燒後就開始咳有痰好鼻水……西藥食過，喉棗末又食過都唔得……請問有咩湯水適合bb 飲呀！！謝謝！
TUNG”
你要幫囡囡拍背,整個背輕拍,然後飲水,有助將痰排走,一日拍兩次.另外可以用紅蘿蔔1個,紅棗6粒,北杏10粒,4碗水煮成2碗服,有助止咳.幾好味的.
芳姐，你好，
我小朋友3歲沒有發燒，痰多，有咳，請問可否飲鱷魚肉湯？
maggie:
如小朋友没發燒,只是痰多咳嗽可飲鱷魚肉湯.
芳姐，
我关注呢个网站好耐啦，得闲就上来浏览，学习。呢个平台真系教识我好多嘢，作为一个妈妈，我亦学习到好多知识来凑好我的小朋友，非常感激你啊，芳姐。加油，祝你生活愉快。
jane:
謝謝你!歡迎常來瀏覽!^^
芳姐你好、小兒咳著個幾月、14歲、看西醫、中醫都唔好、平时都唔咳、早上—起身就咳鼻敏感有鼻水、聽說鱷魚肉好、請問點煲快、、唔該你
hugo:
久咳必虛,故你可用花旗參3錢,桔梗2錢,杞子3錢,麥冬3錢,辛夷花3錢,甘草1錢,4碗水煮20分鐘後加入花旗參再煮5分鐘可供服,連服3天,如症狀改善,隔3天再服一療程.這款茶有助清肺中虛火,有養陰益肺及收鼻水功效.
Win Cheng:
你試用川貝末2錢燉雪梨1個,去核,蜜糖適量,2碗水燉半小時服用,連服3劑,看能否改善?鱷魚肉温性,如痰黃屬風熱咳暫時不宜.
芳姐我想問你我屋企個小朋友3歲半已經咳左成個幾月都仲未好反中醫話佢係鼻敏感起，但飲左6齊藥就有好轉但之後冇端端右有鼻水所以再睇西醫都話佢鼻敏感同鼻水倒流又話個肺無乜野都幾清但食左藥都係唔好再食猴棗散都試過都係未好反咳出泥d痰係黃色所以好頭痛係咪應該煲d鱷魚肉湯俾佢？因為聽人講煲鱷魚肉湯對小朋友氣管幾好但其實應該加d咩材料會配搭岩止咳化痰？如果之後冇事再煲泥飲當保健湯咁飲應該隔耐煲一次呢？
芳姐,你好!
想請問小朋友2-7歲發燒.咳嗽.流鼻水冇乜胃口係咪可以煲准山.茨實粥?另外可煲咩湯止咳化痰??
ching:
淮山,芡實粥發燒時不宜食,因屬補益食療,以免病邪坐大.可用薏米2兩,蘆根1兩,雪梨2個,去核,北杏3錢,6碗水煮成4碗,兩個小朋友一天分服,有退燒及清熱之效.或滾些芫荽葱生薑魚片水供小朋友飲,要趁温熱飲,飲後休息.記得要多飲些水,或每人每天服用1粒維他命C餅,以增强抵抗力.
芳姐 , 你好 !!!
孫女兒( 4 歲 ) 長期咳嗽, 但不是十分嚴重 , 看西醫只說是氣管敏感,想煲 d 食療湯水給她飲 ,有沒有好的提議 ???
另外想請問 : 正宗非洲海底椰在那裡可以買到 ??? 價錢如何 ???
Elaine:
正宗非洲海底椰在上環皇后大道西的中藥店有售,要170元以上一兩,頗貴.不如用虎乳靈芝,買好後叫店員代切片,有强肺功效.可用3錢,配雪耳,百合,杏仁,無花果煲瘦肉湯供服.或買些川貝,研成末,每次取2錢燉蘋果供食都對氣管敏感有益.
芳姐：
我懷孕10星期，可以飲海底椰川貝鱷魚肉湯嗎? 另外，我的胎陀得不太穩，有什麼湯水可幫助？謝謝！
ching:
你可以飲這款鱷魚肉湯.胎動不安,可以煲些桑寄生蓮子雞蛋糖水服.亦可用苧麻根1兩煲雞湯,或用砂仁5錢煲鯽魚湯飲,兩款湯煲1小時可服.
通常我有毛病會先循分類對症尋方,遇難才會求問芳姐。其實芳姐很用心譔寫食譜湯方並分類,還耐心教導我們怎樣了解自己虛實辨証;從芳姐解答網友問題時亦可增加知識以備防範,我相信網友在這裡一定獲益良多,我亦相信大部分網友都尊敬芳姐,不會讓芳姐過於勞累,我們應該好好感謝並愛護芳姐的呀!!
jojo-wong:
謝謝關心!我其實樂於回應真正需要食療的朋友,但有時憑直覺感到有人虛擬一些可有可無的食療來借意聊天,就會感到煩悶.尤其是有些明明是娘娘腔的男人,扮有婦女問題來查詢食療,更覺討厭之至!總之什麼人都有,希望這些人自重吧!如果無法自控的,請看心理醫生!
芳姐,
又懋再問 如有鼻水是濃的,透明色及咳+(譚),冇發燒是否都可飲鱷魚肉湯。
另一款龍利葉湯是否都OK嗎
TKS
ELAIE
elaine:
鱷魚肉湯對咳喘有益,只要不發燒,不是周身痛患感冒都可以飲用.龍脷葉湯性涼,只要煲夠時間就較平和,小朋友無論寒、熱咳都可以飲.
你好芳姐,
上星期煲了鱷魚肉+川貝+無花果+南杏+果皮+瘦肉湯, 想問此湯對氣管敏感是否適合嗎 ,因小朋友一轉天氣,佢就半夜咳又有鼻水
tks
elaine
elaine:
氣管敏感可以飲鱷魚肉湯,有助補益肺氣,但有發燒就不宜服.
芳姐,
想問邊區可買到真的鱷魚肉。
tks
elaine
elaine:
大昌超巿都有鱷魚肉(鮮品)賣.上環多間海味店有乾品出售,我想大間海味店亦會有乾品賣的.
芳姐,你好!請問合掌瓜是否寒涼?小兒剛有咳嗽,是否可以飲用這款湯水?
謝謝!
Sze:
合掌瓜性平微涼,小兒有咳嗽都可以飲.加兩片薑就成.