By 芳姐 ( 22 8 月, 2012 at 7:05 上午)
· Filed under 皮膚病/暗瘡
敏感體質的人往往會對一些食物或毛塵、油漆等物料影響而出現過敏反應.而每個人的致敏源都不盡相同,故如果出現蕁麻疹(即俗稱的風疹塊,風癩等)過敏性皮膚病,就需留意發病前一、兩天吃過或接觸過的致敏東西,以後避免接觸才可減少發病.
急性蕁麻疹治療以袪風,清熱,袪濕為主,可用生薑4,5片,紅糖2兩,米醋1碗,加水煮5分鐘,早、午、晚服,每次1湯匙,温水送服.蒜醋對風疹塊亦有療效,可內服兼外用.內服每天服3次,每次1茶匙,温水送服;外用以藥棉沾醋汁塗患處,很快可消疹.
蒜醋製法簡單,用料是蒜、米醋和冰糖.蒜去衣切片,不用清洗,直接放入玻璃瓶,倒入純米醋及冰糖碎即成.浸4個月即可飲用.蒜與醋的比例是1:2; 冰糖可按個人喜好用量,放入後隔天搖晃幾下玻璃瓶,很快可溶解.
~ 小貼士: 經常患蕁麻疹人士平時飲食宜少肉多菜,因為多吃肉類,體質會偏酸,發病機會就會增加.
Permalink
芳姐你好，想問下女女22個月大，自兩個月前起咳吾停，但又吾係成日咳，後尾醫生話係氣管敏感咳，直到宜家佢又出埋風癩，一出就氣管又咳，一直食西藥，食左停左又發，想問可以飲生熟薏米水去濕嗎？因家中都比較濕，亦有霉菌出現，所以月尾會搬屋。佢咁既情況是否身體太濕而引致？？謝謝
cat:
你可以用雲苓,白朮,扁豆衣各3錢,4碗水煮半個鐘供仔仔飲,有助健脾袪濕.很平和的,可作開奶茶.
芳姐，我發現天氣潮濕囝囝就起風癩，有冇D咩可以改善下？囝囝10個月大，謝謝
CAT:
如仔仔出風疹可以用樟木碎沖涼,但G6PD患兒不可用.
芳姐，囝囝九個月大，可唔可以用樟木碎水沖涼？
suki:
出風癩必定和吃過或接觸過致敏物有關,你最好記錄下發病當壓吃過或接觸過的東西,逐一來測試,試到後以後避免吃或接觸就不會出風癩.可以用黑豆1兩,黑芝麻5錢,黑棗6粒,5碗水煮成2碗服,連服3劑,此湯補益,餵奶適合.
芳姐，
9/1開始出風癩之前做過三伏，中醫就話我風多，飲左一星期藥就冇出，但停後又出現。尤其放工回家後更加嚴重，範圍大左。唔知壓力有冇關係呢？因為公司工作繁重，可能有無形的壓力，我未注意到。請問有什麼食療可幫助，現正正餵母乳中。謝謝！
王小姐:
你試用黑豆1兩,黑芝麻5錢,黑棗8粒,5碗水煮成2碗服,有助改善風疹.另外必須找出致病的致敏源,可以在發病那天記錄一下吃過或接觸過什麼東西,逐一去試,試到了,以後避免接觸或吃就不會發病.
芳姐
你好！我近一兩個月突然出風癩，睇左中醫話風燥，唔夠血，不建議飲菊花茶/薑茶之類，請問還有什麼可以温和地調理？
見葯單已有土伏岺，山熟地之類，前後已飲了八天中葯，每日兩次，但未見好轉
謝謝
王小姐
謝謝, 芳姐!!
我會試下你的方法 ^v^
MAN MAN:
蕁麻疹應該是吃了或接觸了致敏物才會發病,故必須找出致敏源,以後忌吃或忌接觸才可減少發病.你可以用橄欖油1湯匙,純米醋2湯匙調勻,用藥棉沾液塗患處,有助止癢.一日塗3次.蕁麻疹只要不是德國麻疹不會影響胎兒,但有可能媽媽不宜吃或接觸的致敏物,子女都可能有相同情況,但不是個個子女都如此,有些會像爸爸的體質.
芳姐, 你好!!
我本人上年12月開始發覺大腿和背部覺得好痕, 初時以為有蟲咬, 維持個半月仍然痕。一個半月後,睇左中, 西醫, 都話我蕁痳疹, 食了好多抗生素抗敏, 一停藥就痕, 尢其是訓覺雲晨2~4點痕到訓唔到, 已經依家變作慢性 。現在我每隔一晚都要食一粒抗敏藥才能止痕。我想問蕁痳疹可否懷孕? 會否傳給下一代??另外, 亦想詢問一下有什麼方法可以根止, 謝謝芳姐!!
HEDDY:
你試用鮮土茯苓2兩,赤小豆,綠豆,薏米各1兩,蜜棗2粒煲瘦肉湯,8碗水煮成4碗,分2天服,連服2劑(飲4天),有助清熱解毒,消疹.
芳姐你好
三星期前吃過四粒榴槤後 第二朝大腿後出風癩 每晚都係係11點左右就出 出左兩個禮拜 之後兩四五日冇出 之後打咗三晚邊爐又出 已經一個禮拜 之前一晚起一次 呢兩日變咗一日起兩三次 有用純米酒抹患處/沖涼之後兩個鐘左右會退 呢個星期我都有戒口 但情況都冇好轉
請問應如何處理 一發就口痕😣
BETH:
夜汗可以用黑豆1兩,浮小麥5錢,黑棗8粒,6碗水煮成3碗,仔仔飲1碗,囡囡一天分服2碗.連服3~5劑.鼻敏感可以用北茋,防風,白朮,辛夷花,蒼耳子各3錢,紅棗6粒,炙甘草1錢,5碗水煮成2碗,一星期2~3次,有助增强體質,防治鼻敏感.
芳姐你好，
小兒2歳半前排生風疹，好返想調理身體，佢有夜汗，可以㷛咩佢飲？
另外大女兒7歳有鼻敏感，已困擾多年，有夜汗，食慾不佳，有方法處理嗎？
謝謝你
joyjoy:
類固醇藥盡量少搽,或搽薄些少,對身體真的不好.中醫認為[治風先治血,血行風自滅.]故孕婦出疹多屬風重,要用補血及袪風藥才成,建議看中醫調理.我試過用一個特別方法止癢,你不妨試試,就是用藥棉沾[李斯德林]潄口水塗患處,居然能止癢,但只能止一時,幾個鐘時間,後來用生的薯仔去皮後塗擦,又能止片刻癢,結果那次出疹最後要看中醫才治好,如你想我推介那位女教授醫師,可用bar頂[聯終芳姐],我會作私人回應.
芳姐你好，
昨天頂唔住看完皮膚專科
醫生話係妊娠疹
類似中醫說胎毒發出來
不過我比較早發出來
都係要等生完先可斷尾
醫生開了些類固醇藥膏及食一款抗敏藥頂住先
但亦睡得不好^_^”
芳姐你好，
我用了2晚樟木碎冲身，效果也不太顯注，也沒有消疹！
之後用鮮蘆薈肉敷下患處反而可舒緩一下止痕！
但晚上仍然痕得睡不到！
其實我是否比較似出孕婦濕疹？
還有其他方法嗎？
謝謝！
joy joy:
你可能吃了或接觸了致敏物才會出風癩,一般濕疹是對稱性的,左邊有,右邊一定有.你都兩邊有疹,但變成一撻撻就似風疹多些.最好買到樟木碎,用1兩加水煮15分鐘,兌入涼水至40度以下沖洗,半小時可消疹.但樟木不是間間中藥店有售,你要去藥店問問.如一時間買不到,試用夏枯草3兩,加水煮半小時,加入涼水至40度以下沖洗,可一天沖洗2次,也有助消疹.
芳姐你好，
本人有身孕六月多月！
自十天前兩邊小腿內側似起紅色粒粒敏感，很痕！之後見更嚴重，很紅，浮起，皮膚想爛咁，但沒有擴散！痕到睡不到，睇過西醫說是孕婦因賀爾蒙影響會有機會出的疹！給了敏感藥及藥膏也沒有作用！皮膚給涼風吹下反而會舒服些！
但至昨天敏感範圍擴大至兩邊大腿內側及兩邊臂及肚，亦痕癢冇比，冇得訓，但敏感變了一撻撻紅多過一粒粒，慶慶地的！今天再看另一西醫，他說是風癩！
我不想再吃西藥，怕對BB不好！
請問我究竟是濕疹或風癩？
怎樣醫治？因沒覺好睡？
謝謝！
WINNIE:
你試用夏枯草1兩,5碗水煮半小時,加些涼開水兌至40度左右替寶寶抹洗患處,有助消疹.另外亦可以用香蕉連皮洗淨,切一小段,連皮一齊搗爛後塗患處,15分鐘後用濕紙巾抹淨,很快見效.
你好 小兒就黎8個月。 他4個幾月時開始出疹 頸同胸前生粒粒同紅色一達達頸
上星期睇過中醫話係風癩 用中藥外敷左一星期都未能消紅
應該如何是好
訪客:
應用米醋作外塗,有助止癢.最好是買到樟木碎,用1兩煲水作外洗,很快消疹.風癩最好查出致敏源,以後避免食或接觸才可減少發病.
你好，十日前第一次起風難keep 住吾散成個禮拜跟住睇西醫先好番，而家又突然起又好痕坊間話搽米酒係患處想問可以嗎？
芳姐,多謝你解答,私信給你!
PANG:
風癩多數接觸了致敏物,中醫多數認為風重,而[治風先治血,血行風自滅],所以會用四物湯,再加消風的袪風藥材,但每個人體質不同.如要我推介中醫,請用Bar頂[聯絡芳姐],我會私人回應作推介.蒜醋我在八珍甜醋店見過有售,可以致電問問.老店信譽好一些,用的米醋會優質一點.
謝謝芳姐回覆，我會嘗試。
芳姐，
您好！我的風癱由今年4月一直到現在未好過,最近轉睇另一中醫師食中藥粉3天後出疹更嚴重,醫師說我藏体內濕毒多,必然發得厲害過多一星期高峰期後便會減淡,但吃藥第4天中午至晚上風癱己出至全身(包括頭皮),全身急性刺痛痕癢及發熱,不得不立即去急症室打針,針後即消退,現在自己吾知點做好,中醫師說法是否真係咁定藥吾夾我呢!
一直也找至敏原因但食物及接觸也找不到,現在自己吾知點做好,中醫師說法是否真係咁?還是藥吾夾我呢!西藥治標不治本,中藥治療漫長及要夾醫師,但一直未遇上,使我意志也消沉起來很怕一世也不會好…….
看見芳姐文章蒜醋也想試下,請問市面現成有賣都有效嗎?是否一樣!
芳姐，
您好！我有風癱（蕁麻疹）兩年了，今年三月病發一次，服了中藥個半月康復，近日外感風寒，引起便溏，這兩天可能因為吃了帶子，翌日出了風癱在面頰，看中醫説我是外感兼風熱，請問黑糖薑茶可服嗎？還有什麼可煲的湯或水可服？
EDITH:
你試用黑豆1兩,黑芝麻5錢,黑棗6粒,5碗水煮成2碗服,連服3劑,看能否改善?如買到樟木碎,用1兩煲水作外洗,很快消疹.如因海鮮引起過敏,可用黑糖薑茶+紫蘇葉3錢同煮,會見效.
謝謝芳姐咁快回覆
MILK:
以前有網友曾說過油麻地新填地街巿有兩檔山草藥檔有樟木碎賣,可惜不清楚正確地址.如出風癩很癢,可以用純米醋外塗,能暫時止癢.超巿賣的5倍濃縮蘋果醋都有止癢作用.
各位想問下你們在哪裏買到樟木碎…要唔要去d 好大型的中藥舖…我仔仔這2天出風難,勁痕..謝
想問樟木碎煮好後係咪用啲渣敷喺風癩上？定係用水抹患處？
SUKI:
樟木碎煮好後用水沖洗患處就成.渣無需用.可否告知你在何處買到樟木碎?因為有不少出風癩的網友都無法買到樟木碎來治風癩的.
芳姐, 我快將喝完一樽蒜醋, 我想問那些浸過的蒜頭是否可以作其他用途(例如炒菜)? 謝謝!
SOCCERLOVER:
浸過的蒜子可以生吃,也可以炒餸,例如配洋葱,番茄煮餸時放一些,煮咕嚕肉時用一些.總之甜甜酸酸的餸菜都適合用這些蒜子炒,有益又好味.
芳姐，你好！我已經有風癩六七年，我通常夏天時起多，而且經期前兩天至經期間，情況好嚴重，即使中西葯都未幫到手，中醫師話我係風熱性，我想知經期前或經期應飲什麼湯水或煲什麼可以減低發疹情況，因為怕太涼，影響左月經，謝謝
ERICA:
出風癩多數是接觸了或吃了致敏東西,故發病那天要記錄低吃過或接觸過之食物或東西,逐一去測試,找到了,以後不去吃或接觸就不會發病.試用綠豆1兩,百合1兩,陳皮1塊,甘草1錢,紅棗6粒煲糖水食,經前一週開始服,連服3劑,有助清熱解毒,消疹.加了紅棗,陳皮,甘草就不太寒涼.
想問蒜醋飲可以保存多久，是否要冷藏?我有一樽已經是上年的，不過沒有冷藏的，而且蒜頭原粒浸的，是否已經不可用了?另外想問兩個小孩無乜胃口，而且細女有痱滋，最近買了一包洛神花山楂麥芽飲，他們是否啱飲?
TARO:
蒜醋無需雪,可以存放幾年.小朋友無胃口可以泡洛神花山楂麥芽飲,另外可以用淮山1兩,雞內金3錢,紅棗6粒煲瘦肉湯服,一星期2次,有助健脾開胃,消積滯.
系呀芳姐,中醫話我血噓生風,謝謝你!
FANNY:
中醫有云:[治風先治血,血行風自滅],風癩起因都是身體風重,故最好用些補血湯水,但中醫應該會開川芎,當歸,熟地,白芍之類的補血藥給你吧?所以都是建議找經驗好的中醫師看看.幾間大學的中醫門診都有很好經驗的中醫師;或政府醫院設有中醫門診的醫師亦佳,不妨去看看.
2月新年到宜家,我系夜晚訓覺半夜成身都系風癩,食左幾個月中藥都無吾好,睇到有d人話痕左幾年,真系好驚
謝謝你，芳姐
芳姐，您好
我想問如係慢性蕁麻疹應該食咩同搽咩會好啲和應該注意啲咩
KELVIN:
如果你能買到樟木碎,用1兩煲水作外洗,半小時內可消疹.平時可用黑芝麻3錢,青肉黑豆1兩,黑棗8粒,5碗水煮成2碗服,連服3劑,如見效,一星期2次.
KEN:
皮膚癢要看經驗好的中醫,如要我作推介,可在BAR頂[聯絡芳姐]作私人回應,先了解你太太皮膚癢原因,了解體質才可推介食療.
我太太身痕已經很多年，睇過中醫同西醫都唔好，時時刻刻都痕！請問有咩辨法醫得好，謝謝
MRS YIU:
應該不是北茋引起,湯料如有菇類,或其他易致敏之材料,會有可能致過敏.故宜將當天吃的東西記錄下來,逐一作測試,找出致敏源,以後少碰為宜.可以煲些綠豆薏米百合糖水作調理.用量隨意.
想問我昨天飲了有北芪的湯水，半夜就起晒全身風癩，有關係嗎？怎樣止痕和方法治癒呢？
芳姨，您好，
我女女三歲幾，出風癩，退吓又出返，有肚痛，又難上廁所，是否煲這款茶喝可以?另外煲沖涼可止痕?出到面都腫晒，擔心，謝謝
謝謝芳姐，會買來試用
FANNY:
你要留意是吃了什麼食物,或接觸了什麼致敏物引起,必須找根源致敏物出來才可避免發病.你試用大蒜苗1兩(街巿有售那種蒜芯),蟬蛻1錢,加水煮15分鐘,去渣取汁作外洗劑,對熱性風疹有效.樟木水則對遇冷吹風加劇者有幫助.現時天氣似乎偏熱,你試用蒜曲蟬蛻水.在我鄉間,鄉民遇皮膚太癢時,便用通便的[便利通]浣腸液作外塗,對任何皮膚搔癢都有效,但治標不治本,只限於止癢.如太癢不妨試用.
芳姐，你好，我用樟木水沖涼後的一小時是消了點腫，但過一陣又起，連食了三天黑豆都沒有好轉，大脾內的風疹還像發炎的，點算好呢？痕癢無比