By 芳姐 ( 10 6 月, 2010 at 7:32 上午)
· Filed under 婦科病／產前，產後／不孕
懷孕初期,孕婦必須吸收足夠葉酸,才可以令胎兒腦部發育正常,故孕婦懷孕初頭三個月,要吃多些燕麥,蛋黃,青綠色葉蔬菜,蘆筍,青椰菜,牛奶,紅蘿蔔等含葉酸豐富的食物.
栗子為[腎之果],它含豐富葉酸,且菜巿塲長年有供應,可用來燘餸,煲湯,或煮糖水都甚為有益.[淮山栗子瘦肉湯] 有健脾益胃,益氣血,補腰腎等功效,適合孕婦飲用.
用料是: 淮山1兩,鮮栗子3兩,粟米1條,紅棗8粒,瘦肉5兩.
做法: 瘦肉出水;栗子去衣,粟米去衣,切段;淮山,紅棗浸洗;將全部材料放入煲內,用8碗水煮約2小時成4碗即成.飲湯吃湯料.
~ 小貼士: 此湯好味有益,全家合飲.淮山,粟米有降血糖功效,適合糖尿病人服用.
Permalink
你好芳姐，我懷孕10週，第5適開始次次瞓覺都會盜汗醒，只有膊頭以上出汗，醒左汗就會停，頭入面好似煲滾水咁，但皮膚係涼的，又唔係發燒。請問可以有咩湯水幫到我呢？唔該晒
新手亞媽:
你有些陰虛盜汗,可用青仁黑豆1兩,浮小麥5錢,南棗6粒,5碗水煮成2碗服,連服3劑.
你好芳姐
剛剛第二胎懷孕滿13週，醫生說胎盤和子宮頸有點近。
昨晚半夜下腹近開入傷口醒來小小刺痛，按下或者身體住接下有少少痛。
擔心是不是因為照顧兒子令到子宮有下墜咁。
有時候瞓醒有點口酸，便秘出血
之前一路都有看你的網址也有參考了你很多煲湯食譜！👍🏽👍🏽
請問有什麼養胎的湯水適合？和調！
10分謝謝你
Ceci:
你試用杜仲,桑寄生各5錢,無花果4粒,青仁黑豆1兩,冰糖適量,5碗水煮45分鐘成2碗服,連服3劑,有助安胎,潤腸.要放鬆心情,如情況没改善要看醫生.
芳姐你好 ：
我今次第二胎已經25週喇，一個星期會飲兩次滴雞精，但早前有少少流啡，呢幾日生唇瘡，未有孕時都一直便秘，到現時都係. 請問煲咩湯水好？謝謝！
Fion:
流啡最好看醫生作檢查,要多休息安胎.生唇瘡熱氣,便秘可以用霸王花,紅蘿蔔,無花果煮瘦肉湯服,最好吃些湯料,有助清熱潤腸通便,連服2劑.如便秘嚴重,可以去超巿買西梅汁服.
懷孕6周，高齡。腳經常覺得凍，穿了襪依然凍，可以吃什麼改善？
Bearbear:
你可以用北茋3錢,防風3錢,桂枝3錢,生薑3片,紅棗或南棗6粒,5碗水煮成2碗服,連服3劑,看能否改善?
謝謝
芳姐，請問現在6週，可以服用阿膠嗎？或是從幾週開始可以服用，有什麼阿膠的湯水食療適合孕婦呢？
心心:
阿膠懷孕可以服,配紅棗炒米茶,加阿膠粉調勻服有健脾補血安胎功效.或阿膠打碎,加水蒸溶作阿膠汁,每次服靚湯或炒米茶飲時可加入調服,一片阿膠片汁可用3~4天.
芳姐：
我懷孕22週，發現舌頭有裂開，潰爛情況，但是唔痛！會否是濕氣重呢？另外，請問有沒有長胎食療，醫生說bb大小細過週數，麻煩回覆！謝謝
toby:
舌頭裂開且有潰爛要看醫生才是,可能陰虛,可以用鮮淮山1支,雪耳3錢,茯苓5錢,南北杏1兩,無花果4粒煲瘦肉湯服,飲湯吃湯料,煲半小時就成.但都是要看醫生才穩陣.此湯亦有助長胎.
芳姐，你好，我現在第二胎六週，見紅又流啡，好擔心，睡不安，請問有咩湯水可以幫助？
Janet:
你可以用桑寄生1兩,蓮子1兩,紅棗6粒,冰糖適量,5碗水煮成2碗服,一星期3劑.另外可用砂仁3錢,白朮4錢,杜仲5錢,紅棗4粒,5碗水煮成2碗服,一星期2劑,有助安胎.
芳姐，你好，這2劑是什麼體質都可以飲嗎？
Janice:
兩劑食療都較平和,體質偏寒較佳,但其他體質都可飲.
妳好呀，芳姐，目前懷孕15周，夜晚瞓覺大概2個小時就去廁所屙尿，幾乎沒有瞓過覺，請問可以食什麼改變嗎？謝謝妳
訪客:
你可用白果10粒,去芯,芡實1兩,覆盆子3錢,紅棗5粒煲瘦肉湯服,飲湯吃些湯料,有助補腎止尿.連服3劑.覆盆子是中藥紅莓乾,有止尿作用.可以適量吃些涼果紅莓乾.
芳姐你好！請問懷孕13週，如果有濕熱，可以煲什麼飲用？🙏🏻
Jasmine:
你可以用茯苓,白朮,扁豆衣各3錢煲冬瓜適量,煲45分鐘飲,連服3劑,有助清熱去濕.
謝謝你🙏🏻😘
芳姐你好感謝你的寶貴時間，我太太懷孕第八週，常常覺得疲倦，想嘔，晚上口乾。請問可以有那些食療幫助，非常感謝期待你的回覆。
關生:
你可以用紫蘇葉2錢,生薑3片,冰糖少許,3碗水煮成1碗供服,連服3劑,有助止嘔,安胎.口乾可以泡些花旗參茶飲用,加石斛粉更佳.用沙參,玉竹,麥冬各3錢,蘋果1個去核煲瘦肉湯飲,有助益氣生津,全家可飲.
非常感謝芳姐
芳姐妳好，目前懷孕11週，常常有胃氣吐出，睡前會放臭屁，飲什麼湯水可舒緩？
irisim:
你可用雲苓,白朮,扁豆衣,砂仁各3錢,蜜棗2粒,5碗水煮成2碗服,砂仁打碎後下,煮5分鐘就成,有助化胃氣, 改善消化不良,又有安胎作用.連服3劑.
芳姐，你好，現時懷孕14週，有時喉嚨乾，容易出粒粒，面同背部都有，應該煲咩湯水好？
Jarry:
你可以用白果10粒,馬蹄半斤,腐竹半張煲瘦肉湯服,有助清熱潤燥,消暗瘡粉刺.用生的白果肉搗爛塗患處,15分鐘後用濕毛巾抹淨,每日1次,很快消粒粒.
謝謝芳姐！另外想問下，成日瞓覺都發夢，個人起身都冇精神仲好攰咁，應該煲D咩好？
Jarry:
你可用小麥米1兩,茯神5錢,炙甘草2錢,百合1兩,圓肉5錢,8碗水煮成4碗,全家可飲,有助養心,補血,清心,安神.
芳姐，請問懷孕2個月，但日日失眠，可以食乜嘢好呢？
訪客:
你試用桑椹子5錢,百合1兩,夜交藤5錢,紅棗5粒,去核,5碗水煮1小時服,連服3劑,看能否改善?
芳姐你好，
請問孕婦可以飲合掌瓜粟米紅蘿蔔豬骨湯嗎
Sandy:
孕婦可以飲合掌瓜湯,没問題.
芳姐：
我現在懷孕26週，去大便乾硬，好難無氣力疴出來，只是不停放屁，請問可以煲什麼湯水有助解決.謝謝！
Shirley:
你試用松子仁5錢,核桃仁,黑芝麻磨成粉,各用1湯匙,温熱水沖服,可加蜜糖,有助潤燥通便.去超巿買西梅乾,每次吃4,5粒,然後飲大大杯水,都有助加快排便.
芳姐你好，我現時懷孕6周，胃時常很脹，沒胃口，舌苔很白，有甚麼可以煲來去濕呢？謝謝!
Christine:
你可以用雲苓,白朮,扁豆衣,砂仁各3錢,陳皮2錢,蜜棗2粒,5碗水煮成2碗服,砂仁打碎後下.有助健脾袪濕,安胎.
請問可5可以加紅蘿蔔呢？
訪客:
加紅蘿蔔没問題.
你好芳姐，而家懷孕10週,食完野消化唔到不停嘔吐，好囗乾，請問可以飲咩湯，感謝
Jobywong:
你可用紫蘇葉3錢,麥冬3錢,生薑3片,冰糖適量,4碗水煮成2碗,一天分服,連服3劑,有助止嘔,生津,安胎.
謝謝你，明天會試一下
桑寄生配黑豆,南棗,雞蛋就不會降血壓,性質平和,你可以飲用. –> 請問黑豆要炒過嗎1?
Sung:
黑豆炒過較温燥,一般煲湯不用炒.
請問用鮮淮山得唔得？
Helen:
可用鮮淮山.
芳姐妳好
我懷孕20 週，初起感冒，有痰同頭重重，可以飲什麼湯？謝謝
Sin Yi:
你可以用蒜子5,6粒,生薑4,5片,冰糖適量,3碗水煮成1碗服,有助解表,防治感冒.可連服2~3劑.要多飲暖水,多休息.
謝謝你
芳姐：
我已懷孕25週, 請問有乜湯水啱而家飲呢？另外何時需要清胎毒？
kei lee:
懷孕6~8個月應清胎毒,可用白蓮鬚5錢,蜜棗2粒,4碗水煮成2碗服,一星期2劑.
還有想請問南棗水如何調制及飲用呢？
謝謝
kei lee:
南棗質地較硬,最好加水先煮至大滾,焗10分鐘才飲.最好適量吃些南棗才有益.一次煮6~8粒.
你好，
請問現時懷孕18週，常常感到口乾口苦口淡，可以飲什麼湯水/飲品，thank you
San:
你可以用沙參,玉竹,雪耳各3錢,雪梨1個,無花果4粒煲瘦肉湯服,連服3劑會有改善.
芳姐您好，我怀孕8周，身体燥热，应是胎火旺。请问是否可饮白茅根、天冬、麦冬、竹叶、南枣饮？请芳姐推荐一些食疗汤水。谢谢！
Rachel:
你可以煲些茅根竹蔗馬蹄紅蘿蔔水飲,有助清燥熱.或煲些菜乾紅蘿蔔陳鴨腎瘦肉湯都有益.
芳姐，你好：
請問懷孕35週，有咩湯水介紹？ thanks!
fanny:
懷孕35週可以多用健脾,營養豐富的湯水,如石斛淮山杞子豬展湯;番茄蘿仔鮮魚湯等.
你好 芳姐 我太太現在大概20週左右,請問有什麼類型湯水適合 謝謝
Hin:
懷孕初期可以多煲些清潤的湯水,例如豆腐鮮魚湯;番茄紫菜蛋花瘦肉湯;沙參玉竹雪梨瘦肉湯等都適合.
芳姐，11週可以用豬肝煲湯嗎?
ching:
豬肝湯補血,但有少許回奶作用,餵人奶就用少些.
BB附近有瘀血和肚痛，應該飲什麼湯水?
mok:
建議快速看婦科中醫師,最好大學附設的中醫門診醫師.
芳姐，你好，我而家懷孕十週，5-6週時見紅＋流啡，
請問而家可以煲D咩湯飲會好D？ 謝謝！
Wingo:
桑寄生,杜仲,砂仁,白朮,紫蘇葉都屬安胎藥,可以多用.例如用桑寄生蓮子紅棗茶;杜仲黑豆南棗排骨湯;紫蘇糖薑茶;砂仁陳皮水等都有益.
芳姐你好，我太太有左兩個月，佢時常覺得凍，請問可以煲咩湯飲呢？謝謝！
Keith:
可以滾些紫蘇葉糖薑茶供服,紫蘇葉能暖胃袪寒,又安胎,用3錢,生薑3,4片,紅糖少許,滾10分鐘可飲,連服3劑.
高太你好
這個湯我唔用紅棗轉黨參可以嗎？
訪客:
可以用3錢黨參的.
芳姐妳好,
我現在23週,因為有子宮肌瘤,有很多東酉不敢吃,我覺得好似唔夠氣和比較攰,請問有什么食療,多謝指教.
高太:
你可以用淮山,蓮子,茯苓,芡實各5錢,紅棗4粒煲排骨湯服,有助健脾益氣袪濕,一星期2~3次,至症狀好為止.
芳姐你好，請問懷孕初期熱氣可以吃或飲什麼清熱？謝謝
Joyce:
可以滾些節瓜豆腐肉片湯;煲些茅根竹蔗紅蘿蔔馬蹄水飲都有清熱作用.
芳姐，你好！
我懷孕約9週，全身容易痕癢，像被蚊子咬一樣，出現大小不一的紅色圓形，在晚上睡覺，情況更嚴重，痕癢到無法入睡。此外，自從懷孕後，常常有黃色的白帶，没有胃口和容易覺得飽，更常常覺得很容易疲倦。
請推介一些湯水或藥膳改善以上情況。謝!
羅太:
皮膚癢要看中醫治理才成,可以用土銀花1兩煲水作外洗劑,每日1次,有助止癢.白帶多可以用白果15粒,去芯,芡實1兩,扁豆1兩,陳皮1個煲瘦肉湯服,煲個半小時,飲湯吃些湯料,全家可飲.有健脾補腎,止白帶等功效.
芳姐，你好！怀孕可以吃沙参玉竹莲子百合煲猪肚汤？怀孕几个月可以喝莲须煲鸡蛋或煲玉米须？谢谢！
豆豆:
懷孕可以飲沙參玉竹蓮子百合豬肚湯.懷孕6~8個月飲蓮鬚茶最佳.
芳姐妳好，這個湯可以轉用鮮淮山嗎？轉了孕婦可以飲用嗎？
may:
可用鮮淮山,孕婦可服,没問題.
謝謝你，芳姐
芳姐，你好
日前懷孕14w,呢兩星期胸部濕疹再出現，奇癢，胸圍會印上黃色點點，應該係濕疹部份破損，請問芳姐我飲什麼湯水改善？謝謝
Grace:
你試用生地5錢,綠豆1兩,赤小豆1兩,陳皮1塊,煲瘦肉湯服,有助涼血袪濕消疹.6碗水煮成2碗服,連服3劑.另外用土銀花1兩煲水作外洗劑,5碗水煮15分鐘,一天分3次用.連用幾天.
謝謝芳姐
你好，我有咗五星期，但胃口好差，沒有胃口用餐，請問有乜嘢湯水可以改善？
Janette:
你試用砂仁,白朮各3錢,陳皮1個,紅棗6粒滾瘦肉湯服,一約煮20分鐘,有助健脾益胃,安胎.砂仁打碎後下.
謝謝
我呢幾日有啡色嘅液體，可以嗎？
Janette:
有啡色液體要留意胎動不安,可以飲砂仁白朮陳皮湯,連服3劑.
芳姐，你好！
我最近皮膚奇癢無比，全身上下會係唔同嘅位置出現，一痕一抓就會起 風疹，屁屁同大髀位置最為嚴重，好短時間痕癢會停止，風疹都會慢慢消失。睇西醫食消炎藥都冇用，煲野飲，煲水冲涼用過好多方法，時好時壞已經一個月了，呢兩日又好嚴重，真是好痛苦😭。求芳姐賜教🙏🏻
Lilu:
你試用鮮土茯苓2兩,生地5錢,綠豆,生薏米各1兩,紅棗4粒煲瘦肉湯,8碗水煮2小時成4碗,可分2天飲用,連服2劑(飲4天),有助清熱解毒,消疹.如未見效,建議看中醫治理.
芳姐，你好，我女兒懷孕2個月，經常暈，冇胃口，胃唔舒服，可以煲甚麼湯水幫助佢？謝謝！
芳姐你好呀。我懷孕19週，早幾天作小產流好多血，幸好bb無事。之前無特別飲任何湯水。出院後，頭暈十分嚴重，落都街難!
想請教芳姐我應該飲咩安胎，止暈?謝謝你
Vicky:
你可以用桑寄生1兩,黑豆1兩,紅棗8粒,去核,冰糖少許,5碗水煮成2碗服,連服3劑,有補肝腎,補血安神,安胎功效.你可能血虛頭暈,飲這款湯補了血可能有所改善.最好吃些黑豆,紅棗.
唔該你。芳姐。連續3日飲嗎。
Vicky:
是連服3劑,飲3天.
芳姐你好，
初懷孕有咩湯水食療好？
Angie:
初懷孕最重要是吸收葉酸豐富的食物,如菠菜豬肝湯;紫菜蛋花湯等,另外可以煲些桑寄生蓮子雞蛋糖水作安胎用.可以去書局買我本《懷孕天書》作參考.
芳姐
懷孕3個月,懷孕初期流血可用
無花果,响螺頭,花膠,蓮子,密棗煲湯嗎?
謝謝
fanny:
懷孕初期可以飲你提的這款湯.但花膠滋膩,一次不要吃太多.
芳姐，你好
懷孕初期可以喝桑寄生黑豆南棗妃子雞蛋茶嗎？
Angela:
懷孕初期很適合飲用,有助補充葉酸及安胎.
謝謝，芳姐😊
我本身怕寒涼，血壓上壓95/下壓60，桑寄生黑豆南棗雞蛋茶寒涼嗎？會降血壓嗎？
Angela:
桑寄生配黑豆,南棗,雞蛋就不會降血壓,性質平和,你可以飲用.
謝謝芳姐
芳姐你好
請問我隻眼生左粒瘡，請問可以飲咩湯水？
maggie:
你可用金銀花,菊花各3錢,3碗水煮7分鐘飲,另外趁茶渣温暖用手巾仔包住敷眼,有助消炎解毒.連服3劑.
感謝
唔好意思
我仲想問如果我破氣可以飲咩湯？
芳姐妳好
我剛懷孕6周，這一，二天有見紅，睇過婦科食左安胎藥都係咁，我想飲下湯水，請問芳姐可以飲得D咩湯水而又可以長胎呢？
謝謝你！
Candy:
你可以用杜仲5錢,桑寄生5錢,黑豆1兩,無花果4粒煲豬展湯,7碗水煮個半鐘服,連服3劑,有助安胎長胎.
謝謝你，芳姐
孕婦有痔瘡問題 肛門痕癢 應該飲咩湯水好呀 芳姐？
謝謝
Gi Gi:
有個簡單方治療痔瘡,用蒜頭5,6粒,放入小瓶中,加米醋浸過面1吋左右,浸一晚,第2天用藥棉沾少許蒜醋塗患處,一日1次,很快治好痔瘡及痕癢.初時有少許刺痛,但幾秒就没事.
謝謝你芳姐 有無湯水可以飲?
GiGi:
可用淡菜2兩,黑豆1兩,無花果4粒煲瘦肉湯服.
淡菜係咩？ 向邊可以買到? 🙏🏻
謝謝芳姐耐心回答 😊
GiGi:
淡菜即俗稱的[旺菜],即曬乾的青口類貝殼.
甘蒜頭加醋可以放到幾耐？ 如果下次復發 需要重新浸過嗎？ 謝謝🙏🏻
GiGI:
蒜醋可以放半年有多,一次浸多些少可看門口,隨時取用.
芳姐，請問17週懷孕，適宜飲羅漢果水嗎，因為昨晚開始又有鼻水和咳，羅漢果水會否涼？
羊羊:
你可用紫蘇葉3錢,生薑3片,紅糖少許,3碗水煮成2碗服,有助改善,並有安胎功效.
你好芳姐：
我係孕婦依家三十六，我有嚴重夜間鼻塞同流鼻涕，鼻涕倒流令到有痰，請問可以用咩療湯方法？
eve:
你試用葱白搗爛塗患處,一日2次.有助舒緩.建議你看醫生治理.
芳姐你好，本人一年前曾流產，現在初孕階段，體質偏弱，手腳冰冷，除了桑寄生外，請問還有什麼湯水有安胎作用呢？謝謝！
Jessica:
你可以用杜仲5錢,黑豆1兩,紅棗6粒,生薑3片煲羊骨湯服,有助安胎,袪寒.
請問幾多碗水煲幾耐？
Jessica:
8 碗水煮2小時成4碗,全家可飲.如一人飲可隔渣存放多一天服用,一日分服2碗.
芳姐你好
目前懷孕六個月，最近想放臭屁丶大便色黃濕軟，是否有些濕熱呢？請芳姐推介一些食療改善？謝謝！
kiki:
你可能脾胃有濕,少食肥膩,生冷及甜食.可用淮山,茯苓,蓮子,芡實各5錢,陳皮1個,紅棗6粒煲瘦肉湯服,連服3劑.