By 芳姐 ( 2 6 月, 2011 at 6:31 上午)
· Filed under 家常湯餸／雜病
海參的售價越來越貴,近日有些迷你小海參,產自澳洲,一百元左右1斤,買些來浸發,肉質爽脆很有咬口,值得一試.我將硬身一點的分開包好,放冰格儲存,日後用來煲湯,較腍身的烹調餸菜最適合.今天介紹這味[家常海參],用料主要是海參,配料可隨意,例如配洋葱,椒絲,雞絲同炒頗惹味;配毛豆,粟粒,紅蘿蔔絲炒則顏色悅目,色,香,味俱全.
用料是: 浸發小海參6~8條,豬柳肉3兩,毛豆,粟粒各2湯匙,蒜茸,薑茸各1茶匙,紅蘿蔔絲,雲耳絲及調味適量.
做法: 小海參用上湯及酒少許煮15分鐘入味,盛起;豬柳枚肉切絲,用生抽,生粉等略醃;燒熱油,爆香薑茸,蒜茸,投入肉絲炒香,再加入毛豆,粟粒,雲耳絲,紅蘿蔔絲兜炒,灒酒,加調味及少許清水,煮片刻,埋一薄芡即成.
~ 小貼士: 這味小菜很鮮味,成本又不貴,有滋陰補腎功效,無論腎陽虛,腎陰虛人士都適合食用.
Permalink
LILY:
哺乳可以吃毛豆,没問題.
芳姐：
餵人奶可否吃毛豆？
謝謝芳姐
芳姐:
原來黃豆芽菜都係,我見佢咀仔好紅,晚上煲左大豆芽豆腐魚湯,2小時後就起,痕得佢猛喊,我平時已經冇比牛肉鵝鴨/蝦/無鱗魚/菠蘿/芒果/南瓜/茄子佢食,唉!都唔知煮乜餸好,有時話好想食牛肉,我測試過幾次,佢食完成面都紅點,成晚吾訓得,請問芳姐,佢愛吃蔬果瓜豆,有冇蔬果瓜類係會發呢,先謝芳姐
好好:
引起濕疹的原因很多,必須找到致敏源,少去食用或接觸,才會少發病.不妨製作一個記錄,將發病前吃過的食物或接觸過的東西記下,到第二次再發作時對照一下,看那些最有可能是致敏源,逐一去試.煩是頗煩的,但找到致敏源避免接觸會好很多.
新鮮蔬果,瓜豆類少發物,可作日常食材,但韭菜,芫荽,春芥,辣椒過食動風,發熱,故要少食.
紅棗,薏米,綠豆,赤小豆,生薑等有助抗過敏,日常不妨多用.
芳姐:
100左右1斤抵食,羨慕啊。呢度最平既墨西哥海蔘要59.99磅,日本小刺蔘地震前119.99磅,震後2星期賣169.99磅。
芳姐﹐請問出既紅點如長腰豆般大,痕癢既,只在眼肚下至面珠,左右對稱出,係咪即是濕疹呢?最近發覺以前常食既本茹/磨菇/芝士,而家一食後當晚就對稱出點,濕疹係無發斷尾?
除左煲乾土伏蕶綠豆赤小豆意米湯外(如果每星期飲3至4碗對4歲小朋友會太涼嗎)有什麼日常小菜可以對濕疹有助,小朋友痕得非常煩燥。濕疹除鵝鴨蝦外﹐有什麼食材需要介口呢?先謝芳姐
好好敬上
好好:
那些小海參真是細少得可憐,如果不是大的海參太貴,我平時都不會買這種迷你海參仔的.現時國內有些人富起來,在香港買貴價海味面不改容,搶到那些鮑,蔘,翅,肚,瑤柱等日日漲價哩!
但凡皮疹左右對稱的,大多數是濕疹.鵝鴨,蝦蟹,無鱗魚,筍屬發物,豬頭肉(包括豬頸肉)都是發物,菌類植物理論上都屬發物,甚至芽菜仔,黃豆芽菜(都是用水浸發出來的食物),濕疹患者最好盡量少食.你們吃了磨菇,會誘發濕疹發作都未定.
土茯苓湯不算太寒涼,可以放多些赤小豆,陳皮及生薑就可以.試用紅棗10粒,生薑6片,桂枝2錢,5碗水煮成2碗服用.對皮膚癢有幫助.
謝謝芳姐!!
還想問一下,端午節快到,屋企人包左好多綠豆糭,請問懷孕初期係未唔食得咁多綠豆ga?有咩湯水可以幫孕婦清熱而又不寒涼呢?謝謝
琪琪:
吃些有綠豆的糉没問題,煮了多個鐘,不寒涼的.平時可以煲些竹蔗馬蹄紅蘿蔔水來飲(不要加茅根),或煲些番茄豆腐鮮魚湯,菜乾紅蘿蔔粟米陳腎湯等都有清熱作用,又不會太寒涼.
請問芳姐你所講$100左右一1斤咁平係邊度買到 ?
NANA:
在上環有得賣,不過我去旺角長旺街街巿,見有兩間海味店賣88元1斤哩!
請問芳姐, 懷孕初期可以飲”清補涼”嗎? 我聽有個”涼”字, 覺得係涼湯, 不知是否.
另, 清補涼裡面有”意米”, 是否忌食”意米”? 感謝.
carmen:
清補涼既能[清]熱除燥,又能[補]益身體,且有[涼]潤作用,故才叫清補涼.孕婦應該適合食,但由於薏米有很輕微的令子宮收縮作用故最好不放薏米.
芳姐
你好,請問懷孕初期如咳嗽可以燉川貝南北杏瘦肉湯飲嗎?因我每次咳飲呢個湯都很見效的.還有現在經常失眠,口淡淡,同疲倦,請問有咩食療可改善,謝謝
琪琪:
懷孕都可以服川貝杏仁瘦肉湯.經常失眠,口淡淡,疲倦,可以用海玉竹3錢,百合1兩,蓮子1兩,紅棗6粒煲蘋果湯飲,好味又有養心安神作用.
芳姐:
你好! 我兒4歲,上星期因感冒,睇左醫生好番,現在開始有咳,(係好咳)和發現他逗氣時有聲,好似好用力的,唔知咁樣係咪即係氣喘呢,我問佢係咪好辛苦,佢又話唔係,真係好擔心,請問芳姐有咩湯水可幫助他止咳呢?
May:
你仔仔可能氣管敏感,可以用核桃肉,南北杏仁各1兩,白果5粒(去芯),鮮腐皮1/4張煲粥供服,隨量食用,有止咳定喘之效.